Instituti Re-ACT Lab, në partneritet me Friedrich Ebert Stiftung (FES) – Zyra në Prishtinë, po organizon punëtorinë për hartimin e politikave "Bashkë-Dizajnimi i Politikave Publike: Ndryshimet në Tregun e Punës dhe Hendeku Digjital".

Kosova po bëhet gjithnjë e më e ndjeshme ndaj disa goditjeve, qofshin ato institucionale apo ekologjike. Hulumtimi ynë ka theksuar se kornizat rregullative dhe mënyra se si qeveria i adreson këto goditje mbeten një aspekt thelbësor për ndërtimin e reziliencës së institucioneve dhe shoqërisë, me qëllim përthithjen dhe përshtatjen ndaj ndikimit të tyre.

Ndërsa transformimi digjital shpesh shihet si një sfidë thjesht teknike, hulumtimi ynë e trajton atë si një çështje rezilience. Kosova ka një shkallë të lartë të depërtimit të internetit në familje (96%), megjithatë ekziston një “paradoks i mbulimit”, ku qasja e lartë maskon një mungesë të thellë të përdorimit kuptimplotë dhe të aftësive digjitale. Ky hendek i “nivelit të dytë” i lë popullatat e cenueshme – veçanërisht të moshuarit, banorët e zonave rurale dhe komunitetet e margjinalizuara – të përjashtuara nga përfitimet e digjitalizimit. Rezilienca e kornizës aktuale rregullative është e ulët (me vlerësim 42%), kryesisht për shkak të mungesës së kapaciteteve rezervë (redundancy) dhe shpejtësisë së reagimit (rapidity). Pa mekanizma specifikë për të mbrojtur qytetarët që nuk mund të orientohen në shërbimet vetëm digjitale, digjitalizimi i shpejtë i shërbimeve shtetërore rrezikon të thellojë përjashtimin social në vend që ta ngushtojë atë. Ndërtimi i reziliencës këtu nënkupton krijimin e një mjedisi rregullativ që siguron se asnjë qytetar nuk mbetet pas gjatë një krize qasjeje apo dështimi të infrastrukturës digjitale.